بقلم / نجلاء الشنواني
احلام خلف الإزاز
بهيكل كهل من بره
وشايل فيه ملامح طفل
ما بين الكرة والكرة
بيتسرسب للحظة يطل
على سطح الزمن وراه
صبية شايلة عقد الفل
وبتخبط على إزاز العيون
فيفتح ليها بابه تهل
ببسمة فيها م الطيبة
ما يكفى القلب لاجل يبوح
وياخد عقدها الابيض
يلفه فوق جدار الروح
وتسرق منه أوجاعه
وتهدي له العبير بيفوح
بريحة الحب والضمة
وألوان الكلام مسموح
يغمض عينه كام لحظة
يفتحها بكسرة قلب
يفوق من حلمه مستغرب
على صوت الحنين الصعب
كفاياك الجسد هلكان
لا هو حمل أن يرجع شاب
فلا ترجع وتتسرسب
وتحلم بالمحال يا قلب
أخر المشاركات